11 Noyabr tarixində Göttingen şəhərində Almaniyadakı Azərbaycanlı Tibb İşçiləri Birliyinin
(AATİB/AMD e.V.) 8 Noyabr “Zəfər Günü”nə həsr olunmuş konfransı keçirilib. Tədbirdə
Almaniyada çalışan yüzdən artıq azərbaycanlı həkim və elm xadimləri iştirak edib. Konfransın rəsmi
hissəsi Qarabağ uğrunda həlak olmuş şəhidlərimizin ruhunu bir dəqiqəlik sükut ilə anmaqla başlayıb.
Tədbirdə açılış nitqləri ilə çıxış edən AATİB sədri doktor Elşən Qarayev və sədr müavini doktor
Elşən Ağayev iştirakçıları salamlayaraq Zəfər Günü münasibətilə təbrik edib, konfransın önəmi
barədə məlumat veriblər. Daha sonra geniş təqdimatla çıxış edən E. Qarayev AATİB-in tarixi və son
illərdəki fəaliyyəti barədə konfrans iştirakçılarına ətraflı məlumat verib.
Konfransa Azərbaycandan telekörpü vasitəsi ilə qoşulan TƏBİB-in İcraçı Direktoru cənab Vüqar
Qurbanov konfrans iştirakçılarını salamlayıb və Zəfər Günü münasibətilə təbrik edib. Cənab
Qurbanov çıxışında TƏBİB-in Azərbaycandakı uğurlu fəaliyyəti barədə məlumat verib, xaricdə təhsil
almış həkimlərin ölkə səhiyyəsindəki önəmindən danışıb. O, həmçinin son illər TƏBİB-in beynəlxalq
fəaliyyəti çərçivəsində xaricdə çalışan azərbaycanlı həkimlər və tibb təşkilatları ilə əlaqələrin
möhkəmlənməsindən, birgə əməkdaşlığın əhəmiyyətindən bəhs edib.
Tədbirdə çıxış edən AATİB fəxri üzvü, Almaniyada Mannheim Universitet Xəstəxanasında çalışan
azərbaycanlı həkim və elm xadimi Dr. Vüqar Yaqublu Almaniya və Azərbaycan arasında səhiyyə
sahəsində icra olunan layihələrdən və yeni ideyalardan danışıb. Natiq çıxışında interdissiplinar
təbabətin önəmini vurğulayıb və həkimlərimizi Azərbaycandakı qurumlar ilə icra olunan layihələrdə
yaxından iştirak etməyə çağırıb.
Konfransın ikinci hissəsi Almaniyada müxtəlif ixtisaslarda çalışan həkimlərin elmi çıxışları ilə
davam edib.
AATİB İdarə Heyəti üzvləri neyrocərrahlar Turab Qasımov və Ruslan Muradzadə, həmçinin torakal
cərrahlar Elbəy Rəsullu və Əziz Fətulla təqdimatlarında öz ixtisasları üzrə ən aktual mövzulara
toxunaraq konfrans iştirakçılarının qarşısında maraqlı mühazirələrlə çıxış ediblər.
Tədbirə dəvət olunmuş çıxışçılardan Leyla Werner Almaniyada pulmonologiya ixtisasında
rezidentura təhsili və bu ixtisasın önəmi, oral cərrahiyyə mütəxəssisi Pərviz Rəhimli isə özəl
stomatoloji sığortanın üstünlükləri barəsində məlumat veriblər.
Konfransa dəvət olunmuş mütəxəssislər arasında Almaniyada ən böyük ailə sağlamlıq mərkəzi
şəbəkələrindən biri “All&Inn Medizin“ sahibləri olan azərbaycanlı həkimlər Fuad Orucov və Yusif
Rüstəmov öz uğurlu təcrübələri barədə iştirakçıları məlumatlandırıb, ailə həkimliyi institutunun
səhiyyə sistemində önəmi barədə geniş məruzə ilə çıxış ediblər.
Konfransın sonunda AATİB-ə yeni üzvlər qeydiyyata alınıb, növbəti illər üçün idarə heyətinə
seçkilər baş tutub.
Qeyd edək ki, Almaniyadakı Azərbaycanlı Tibb İşçiləri Birliyi 2020-ci ilin dekabr ayında Almaniya
Federativ Respublikasının Visbaden şəhəri Ədliyyə Baş İdarəsinin 02.12.2020-ci il 7380 No-li qərarı
ilə qeydiyyatdan keçmişdir (AATİB, almanca AMD e.V.) və azərbaycanlı həkimlər tərəfindən
Almaniyada bu formatda yaradılmış ilk birlikdir.
Nəzərinizə çatdırmaq istəyirik ki, AATİB Almaniyada çalışan yüzlərlə azərbaycanlı tibb işçisini, tibb
sahəsində akademik fəaliyyətlə məşğul olanları və tibb tələbələrini təmsil etməyi, onlar arasında
əməkdaşlıq əlaqələrinin effektiv qurulmasını və inkişafını əsas hədəflərindən biri olaraq seçmişdir.
Hörmətlə,
AATİB İdarə Heyəti
Frankfurt am Mayn şəhəri
12 Noyabr 2023-cü il
Əlaqə üçün:
info@amedeu.de
+49 17647097505